प्रेमसंबंधासाठी दबाव आणल्याचा आरोप; आजीसमोर व्यक्त केली होती व्यथा, भाऊ-बहिणीविरुद्ध आत्महत्येस प्रवृत्त केल्याचा गुन्हा…
प्रतिनिधी | अमळनेर : तालुक्यातील कावपिंप्री येथील दहावीत शिकणाऱ्या अनुष्का रवींद्र सपकाळे हिच्या आत्महत्या प्रकरणाला आता गंभीर वळण मिळाले आहे. प्रेमसंबंध ठेवण्यासाठी दबाव आणल्याच्या आरोपावरून संबंधित तरुण व त्याच्या बहिणीविरुद्ध आत्महत्येस प्रवृत्त केल्याचा गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक कविता ठाणगे करीत आहेत.
अनुष्का ही कावपिंप्री येथील सर्वोदय माध्यमिक विद्यालयात इयत्ता दहावीत शिक्षण घेत होती. ५ सप्टेंबर २०२६ रोजी शिक्षक दिनानिमित्त सकाळी तिने विद्यार्थ्यांसमोर शिक्षकाची भूमिका साकारत वर्गात शिकवले. मात्र, त्याच दिवशी काही तासांनंतर घडलेल्या दुर्दैवी घटनेने गावात हळहळ व्यक्त होत आहे.
अनुष्काचे वडील अनेक वर्षांपूर्वीच मयत झाले होते. तिची आई सुरत येथे राहत असल्याने अनुष्का कावपिंप्री येथे नातेवाईकांसोबत राहत होती. ५ सप्टेंबर रोजी दुपारी घरातील व्यक्ती बाहेर गेल्यानंतर तिने राहत्या घरात गळफास घेऊन आत्महत्या केली.
घटनेची माहिती मिळताच पोलिसांनी घटनास्थळी धाव घेतली. अनुष्काला तातडीने रुग्णालयात दाखल करण्यात आले; मात्र वैद्यकीय तपासणीनंतर डॉक्टरांनी तिला मृत घोषित केले. प्रारंभी या घटनेची अकस्मात मृत्यू म्हणून नोंद करण्यात आली होती.
तपासादरम्यान अनुष्काने आपल्या आजीसमोर एका तरुणाकडून प्रेमसंबंध ठेवण्यासाठी दबाव आणला जात असल्याचे सांगितल्याची माहिती पोलिस तपासातून समोर आली आहे. संबंधित तरुणाची बहीणदेखील अनुष्कावर त्याच तरुणासोबत प्रेमसंबंध ठेवण्यासाठी दबाव आणत असल्याचा आरोप करण्यात आला आहे.
अनुष्काने आजीला संबंधित व्यक्तींना समजावून सांगण्याची विनंती केली होती. तसे न झाल्यास आपण स्वतःचे काहीतरी करून घेऊ, अशा आशयाचे तिने सांगितल्याचे तपासात नमूद करण्यात येत आहे. त्यानंतर आजीने संबंधित दोघांना समज देण्याचा प्रयत्न केल्याची माहिती आहे. मात्र, या घटनेनंतर काही दिवसांतच अनुष्काने टोकाचे पाऊल उचलल्याने प्रकरणाची गंभीरता वाढली आहे.
या प्रकरणात पोलिसांनी संबंधित भाऊ-बहिणीविरुद्ध आत्महत्येस प्रवृत्त केल्याचा गुन्हा दाखल केला आहे. अनुष्कावर नेमका कोणत्या प्रकारचा दबाव आणण्यात आला होता, तो किती काळापासून होता आणि या दबावाचा तिच्या मानसिक स्थितीवर नेमका काय परिणाम झाला, याबाबत पोलिसांकडून तपास सुरू आहे.
संबंधित व्यक्तींचे जबाब, उपलब्ध पुरावे तसेच घटनेपूर्वीचा घटनाक्रम यांची पोलिसांकडून पडताळणी केली जात आहे. त्यामुळे तपास पूर्ण झाल्यानंतरच या प्रकरणातील वस्तुस्थिती अधिक स्पष्ट होणार आहे. या प्रकरणाचा पुढील तपास पोलीस उपनिरीक्षक कविता ठाणगे करीत आहेत.
About the Author
